Kreuzzug Heinrichs VI.

Dr Chrüzzuug vom Heinrich em VI. im Joor 1197/98 (me säit em au dr Dütsch Chrüzzuug) isch vom Kaiser Heinrich VI. aagstoosse worde as Reakzioon druf, ass si Vater Friedrich I. Barbarossa mit em Kreuzzug 1189–90 gschiteret isch. Dr Heinrich VI. isch no churz bevor d Räis aagfange het, 1197 z Messina gstorbe. Wägen em Händel, wo denn um die dütschi Droonfolg usbroche isch, häi d Chrüzfaarer dr Chrüzzuug abbroche. D Armee isch scho underwägs gsi in s Häilige Land und het dört dr Küstesträife zwüsche Tyrus und Tripolis mit de Stedt Sidon und Beirut wider under christligi Kontrolle brocht. 1198 isch si wider in d Häimet zrugg.

E hufe Däilnäämer an däm Chrüzzuug häi im Merz 1198 d Hospitalgnosseschaft, wo 1190 wääred dr Belaagerig vo Akkon gründet worde isch, in dr Dütsch Orde umgwandlet.

Noch em Chrüzzuug vom Heinrich VI. häi sich die dütsche Aadlige au wider mee uf d Erooberig vo de häidnische Gebiet östlig vo dr Elbe z Pröisse und im Baltikum, wo mit em Wendechrüzzuug 1147 aagfange het, afo konzentriere.